ساعه مغربيه

كانت ساعه المغربيه
والبحر كبير اوى ادام عنيا
وبعيد الشمس بتستغيث بيا
والبحر يغطيها وانا ايه بايديا ؟؟
دانا رجلى مش شيلانى م كتر الهم اللى بيا!!
هتقولى انت شوفت ايه من الدنيا؟
يااااه انا ياما شفت لما شاب شعري وانا لسه صحتى فيا
والحزن رسم ف وشي العجز لما بان عليا
يابنى دانت لسه ابن امبارح
ما من امبارح شوفت ياما يا ناس
دانا صاحبي باعنى ف وسط الطريق
مطلعش اصيل ورفيق
باعنى من اول خصام
من غير عتاب ولا كلام
خد شنتطه وسابلي الطريق
فضلت ماشي ف ليل طويل
وحدى بدندن م الوحده يا عين يا ليل
لقيت قعده وناس سهرانين
شكلهم مبسوطين
قولت اقعد معاهم يمكن ابقي ليهم صديق
رميت سلام والكلام جاب كلام
كلمه ف سؤال ف حدوته
حدوتى مش ملتوته
دانا لسه ابن امبارح والجيب مفهوش سايب
كل الموجود كام جنيه
ينقعوا بس ف ايه؟؟؟
وفجأه القعده مبقتش مظبوطه
انا جيت ع الجرح ولا ايه
ايه انا عملت ايه؟؟
الضحك قلب حسرة
والدمعه بقيت منكسره
كل واحد ف قلبه حدوته
لا فيها ضحكه ولا حتى هى صغنطوته
سيباهم ومشيت
وهمهم ف قلبي حطيت
ورجعت ادندن تانى طب اعمل ايه
ما الوحده مش سيبانى
مشت وانا بدندن لحد ما رجليا اننت
ايه تعبت من الطريق!!
قولت اقعد ارتاح
قعدت لوحدى مش ناقصه جراح
قعد قدامى حبيبين
قولت شكلها لسه بخير
مفيش ثوانى ولمحت دمع مالى العين
م غير ما يحكوا فاهم ايه بكى العين
ابوها عايز قايمه ومهر وشقه
وهو ظروفه مش مساعده
طب يا عمى بحبها
حبك لا هياكلها ولا يدوم لها
وقومت تانى وزاد ف قلبي جرح تانى
قولت مفيش غير البحر
اشكيله همومى
رحت لقيت الشمس غرقت من كتر الهموم
والبحر ثاير وعايز يرمب همومه
يعمل ايه الحمل تقيل عليه
سألته طب اعمل ايه؟
قالى يا ابن امبارح كان غيرك عملوا ايه
دمع ف حضن الليل دمعتين
والصبح عيشوا مع العايشين
وكلها كام يوم وتبقي بين ايدين الكريم
يرحمك ويرحمنا اجمعين